தமிழ் சினிமாவில் அர்ஜூன் நடிப்பில் 1993ஆம் ஆண்டு வெளியான படம் ‘ஜென்டில் மேன்’. இப்படத்தின் மூலம் தமிழ் ரசிகர்களுக்கு இயக்குநராக அறிமுகமானவர் ஷங்கர். ஊழலை மையமாக வைத்து எடுக்கப்பட்ட இப்படத்தில் அர்ஜூனுடன் மதுபாலா, செந்தில், கவுண்டமணி, மனோரமா உள்ளிட்ட பலர் நடித்திருந்தனர்.
‘ஜென்டில் மேன்’ படத்துக்கு ஏ.ஆர் ரஹ்மான் இசையமைக்க கே.டி குஞ்சுமோன் தயாரித்திருந்தார். ‘ஜென்டில்மேன்’ படத்தின் இரண்டாம் பாகத்தை எடுப்பதற்காக தயாரிப்பாளர் குஞ்சு மோன் இயக்குநர் ஷங்கர், நடிகர் அர்ஜுனிடம் பேச்சுவார்த்தை நடத்தியுள்ளார். ஆனால் இவர்கள் இருவரும் வேறு படத்தில் பிஸியாக இருப்பதாக சொல்லி மறுத்து விட்டார்களாம். ஷங்கரின் வெற்றிக்கு ஏணியாக அமைந்த குஞ்சு மோகனின் பட வாய்ப்பை நிராகரித்தது கோலிவுட்டில் சலசலப்பை ஏற்படுத்தியது.
இதனால் புதுமுகங்களை வைத்து ‘ஜென்டில்மேன் 2’ படத்தை குஞ்சுமோன் தயாரிக்கவுள்ளார். இப்படத்திற்கு ‘பாகுபலி’, ‘ஆர்ஆர்ஆர்’ பட இசையமைப்பாளர் கீரவாணி இசையமைக்கிறார். இப்படத்தின் இயக்குநர், நடிகர், நடிகைகள், துணை கதாபாத்திரங்கள், தொழில் நுட்ப கலைஞர்கள் உள்ளிட்டோர் விபரங்கள் விரைவில் வெளியாகும் என எதிர்பார்க்கப்படுகிறது.
ஷங்கரின் மருமகன் மீது பாலியல் வன்முறை புகார், ‘அந்நியன்’ இந்தி ரீமேக் விவகாரம் என ஏற்கனவே ஷங்கரை சுற்றி பல பிரச்சனைகள் இருக்க இப்போது ‘ஜென்டில் மேன்’ பிரச்சனையும் இதில் இணைந்துள்ளது.